O pasado venres, día 28 de maio, o alumnado do Equipo de Normalización e Dinamiazación Lingüística do IES Félix Muriel de Rianxo recibimos a visita de rapaces e rapazas da súa mesma idade dun instituto do Morrazo: o IES Rodeira de Cangas. A actividade consistiu en que o alumnado dos dous centros realizasen unha xornada de convivencia empregando a lingua galega, lingua habitual do alumnado rianxeiro pero non do cangués.
Sobre as 10 da mañá, o alumnado de Cangas chegaba ao IES rianxeiro onde foi recibido no salón de actos, onde os membros do ENDL lles presentaron as actividades do equipo, explicaron as características máis destacadas do seu concello e mais o itinerario da xornada de convivencia.

Os oriundos fixeron de guías na visita programada pola vila rianxeira durante a mañá, que discurriu desde a praia da Torre e mailo castelo da lúa até a praia de Tanxil, parando no centro da vila para visitar a capela da Guadalupe, as casas de Castelao, Dieste e M. Antonio, a igrexa de Santa Columbra, a praciña coas casas do remo, a ribeira…
Ao medio día dirixíronse aos Castros Neixón, onde xantaron e visitaron os castros, para logo subir ao Pico Muralla onde, como o día estaba bo, puideron disfrutar da paisaxe. A última visita foi ao hórreo do Araño, despedindo logo os visitantes na praza de M. Antonio en Asados ás 19:00 horas.

Todo o alumnado participante contou cun dosier informativo sobre todos os monumentos e os espazos naturais, e para facer máis amena a visita, todos participaron nun xogo de pistas.
Esta xa era a segunda xornada de convivencia, pois xa houbo un primeiro encontro na vila do Morrazo no mes de abril con resultados moi positivos e onde os rianxeiros coñeceron, ademais da vila de Cangas, o cruceiro de Hío, a punta de Cabo home e mais a praia de Melide.