O luns 19 de outubro de 2009 chegou a visita a Rianxo dos membros internacionais da asociación escolar comenius. En total chegan 16 persoas procedentes de moi distintos países: Grecia, Alemaña e Polonia. Seis profesores/as e dez alumnos/as, os cales serán recollidos por parte das familias anfitrioas, e pola noite terá lugar a xuntanza do profesorado dos distintos países nunha cea informal de presentación.
Mañá, a primeira hora celebrarase un acto de benvida no I.E.S., e tamén unha visita ao centro, para participar en distintas actividades. A media mañá, irán visitar o porto de Rianxo, e despois do xantar farán unha saída en autobús, visitando o Parque Natural de Corrubedo, o Mirador da Curota, o Dolmen de Axeitos e o Castro de Baroña ou Neixón. A redor das sete e media da tarde regresarán a Rianxo, e cada alumno/a irá coas súas respectivas familias.
O mércores visitarán Santiago de Compostela.
O xoves, achegaranse a Portugal, en concreto Viana do Castelo e Valença do Miño, e tamén farán unha parada en Tui.
O venres pola mañá levarase a cabo unha reunión de traballo do profesorado coordinador para tratar diversos aspectos do proxecto (temporalización, planificación de informes e curtametraxes, avaliación da visita,ect.). Mentres tanto o alumnado visitante participará nas actividades académicas do centro. Ás sete terá lugar un serán ao que está convidado o alumnado, o profesorado visitante e as familias.
Por último, o sábado será o día de regreso dos nosos visitantes aos seus os respectivos países de orixe.