Cando alguén ten poder para tomar decisións nun grupo, dise que “leva os pantalóns”. Isto asóciase directamente ca figura masculina, que sempre levou esta prenda, deixando na sombra a todas as mulleres que ao longo da historia usaron vestidos e saias e non puideron gozar dos mesmos dereitos que o home. A vestimenta, o traballo e as parellas heterosexuais son hoxe en día ámbitos nos que o machismo e o conservadorismo destacan.

A crenza na inferioridade da muller leva da man a necesidade do uso de maquillaxe, tacóns, vestidos… Todo aquilo que os homes aparentemente “non precisan” para lucir ben. Non existe ningunha razón biolóxica que explique que a muller deba ser un obxecto de beleza nin ningunha razón pola cal debe “sufrir para lucir”. É por iso que en actos importantes nos que se lle esixe ao colectivo feminino vestirse dunha determinada maneira, o porqué só se basea en ideas machistas e conservadoras.

Hai arredor de 50 anos, certos traballos debían ser desempeñados por mulleres. Por exemplo, non existían os azafatos de voo. Este labor non podía ser propia dos homes, posto que a súa finalidade era contentar aos pasaxeiros e que estes recibiran luxosos e pracenteiros viaxes. Esixíanse mulleres guapas, altas, solteiras, novas e encantadoras. Afortunadamente, aínda que os uniformes das compañías aéreas fagan unha distinción entre os dous sexos en canto ao deseño, hai que valorar o avance que se levou a cabo. Con todo, seguiremos chamando “señoras da limpeza” ao persoal que elimina o lixo dos espazos comúns.

Por outra banda, o ámbito da parella formada por un home e unha muller é o máis preocupante á hora de analizar a suposta igualdade en que vivimos.  En España, a brecha salarial continúa nun 30% a favor do home e a precariedade na que as mulleres traballan tamén é superior: sempre  a favor do patriarcado. E non hai que esquecer que son as mulleres as que adoitan responsabilizarse dos coidados das persoas maiores, das persoas dependentes, dos fillos, das fillas e da casa. Xa basta de “mulleres floreiro”!

Deixemos de ver machismo só noutras sociedades e deixemos de criticar o alleo cando o que nos rodea deixa moito que desexar. Aínda que as actitudes mellorar, queda moito por facer: os comportamentos machistas perduran. É tempo de que as mulleres tamén “leven os pantalóns”.