Carlos Casares publica nove libros de literatura infantil que che presentamos a continuación seguindo a cronoloxía de publicación

O libro toma a forma dunha carta enviada a unha nena e nel aparecen personaxes inesquecibles coma Leoncio, un tolo moi cordo que inventa canóns que disparan caramelos e bombas da felicidade; a abnegada formiga esquiadora que partiu unha perna; ou, por suposto, a misteriosa galiña azul “con cinco plumas vermellas nunha á”, que pon ovos de cores e ten alarmadas ás autoridades. (A galiña azul, Vigo, Galaxia, 1969 [8ª ed., 2002])

___________________________________________________________________________

Polo escenario de As laranxas máis laranxas de tódalas laranxas pasan personaxes ben particulares: unha muller que todo o sabe, un gordo obsesionado coa tortilla, un home con escopeta, un ovo xigante que fala… provocando todo tipo de equívocos e de situación imposibles. O texto gañou o Concurso de Textos Teatrais O Facho en 1973 e editouse con ilustracións orixinais de Luís Seoane que enriquecen o seu universo cómico. (As laranxas máis laranxas de tódalas laranxas, Vigo, Galaxia, 1973 [4ª ed., 1993])

___________________________________________________________________________

Rin é un can vello e forte que sabe falar (e rezar) en varios idiomas e se relaciona cos persoeiros máis importantes da provincia. Xeneroso e ben disposto, dunha vez vese na obriga de ir buscar ao médico para atender á doente Palmira de Ignacio. Camiño da casa da enferma aparece o malvado lobo Crispín, ao que Rin fará fronte con afouteza. (O can Rin e o lobo Crispín, Vigo, Galaxia, 1983 [3ª ed., 1991])

___________________________________________________________________________

Adiantándose ao fenómeno das sagas literarias infantís, Carlos Casares encetou no arranque dos anos noventa a serie de libros nos que o protagonista é Toribio, un neno de oito anos cun enxeño fóra do común. Cheas de humor e imaxinación e marcadas polos fabulosos inventos do seu personaxe principal, as historias, sempre didácticas, reflicten unha das facetas da personalidade do autor: a fascinación pola tecnoloxía. (Este é Toribio, Vigo, Galaxia, 1991.  -  Toribio contra o profesor Smith, Galaxia, Vigo, 1991.  -  Toribio e o contador de contos, Vigo, Galaxia, 1991.  -  Toribio ten unha idea, Vigo, Galaxia, 1992.  -  Toribio revoluciona o tráfico, Vigo, Galaxia, 1994.)

___________________________________________________________________________

Lolo quere que os Reis lle traian unha bicicleta, pero por máis que o intenta non o consegue. Así que decide empezar a practicar na do seu pai, un ciclista nefasto. Faino ás agachadas, no garaxe, con tanta insistencia e en tan pouco espazo que acaba por converterse nun fenómeno. (Lolo anda en bicicleta, Vigo, Galaxia, 1996.)