Anik Nandi, un “bengalego”
Por Luis Cernadas (2º Bac. A)
Visitounos o pasado xoves 19 de xaneiro Anik Nandi, un sociolingüísta de orixe bengalí. Este “bengalego” –como se fai chamar-, Doutor pola Heriot-Watt University de Edimburgo, está impartindo charlas sobre o idioma galego nos institutos a través dun programa da Secretaría Xeral de Política Lingüística.
Nandi, falando un galego moi correcto e fluído, charlou sobre as linguas minorizadas, citando como exemplos o galego en Europa e o bengalí na India. Tamén puxo de manifesto o maltrato que sofren estes idiomas, especialmente o galego, por mor dos prexuízos que seguen presentes na actualidade.
Agora ben, o obxectivo principal da charla non era comparar as situacións destas dúas linguas, senón que buscaba ofrecer argumentos para que o alumando galego utilice a lingua propia do país, en tódolos ámbitos da vida.
Nandi, puxo sobre a mesa as evidentes carencias de normalización dun amplo número de linguas, aportando un claro exemplo: unha festa cunhas cen persoas de todo o mundo. Baseándose en datos estatísticos, Nandi puido afirmar que case a metade dos participantes da festa non terían con quen falar na súa lingua propia, polo que se limitarían a bailar.
Falou tamén de que cada catorce días desaparece unha das 7.000 linguas faladas en todo o mundo, o que afecta moi negativamente á diversidade cultural que nos caracteriza como especie.
Alén disto, para facer máis amena a presentación, mostrounos varios contidos audiovisuais nalgúns dos múltiples idiomas do seu país, explicándonos como son algunhas festas locais e comidas propias. Referiuse igualmente a Bollywood, a industria cinematográfica hindi ubicada en Bombay, a cidade máis poboada da India.
Por último, na rolda de preguntas, entre as cales predominou o tema de como puido aprender tan rápido e tan ben a falar a lingua galega. Respondeu que non lle resultara moi complicado, debido a que xa sabía un pouco de castelán, que estudara algo das súas orixes, pero, sobre todo, “porque tiña interese”.
Se queres participar sigue as intruccións da seguinte ligazón... [Abonarse]