M. Outeiro Hortas é o alcume que empregou Manuel María para publicar este libro de poemas adicado á Valeorras .

 

 

 

 

 

 

CANCIÓN Ó RÍO SIL

O noso Sil cando chega

dende o reino de León:

aprende a fala galega

na que di a súa canción!

De Covas a San Martiño

baixa feliz, rumoroso,

contemplando vagariño

este país tan fermoso.

Polo Barco o seu caudal

é un vidro transparente:

todas as vides do Val

se ollan na súa corrente!

Meu río Sil… Dime si

te lembras das aureanas

que che arrincaban a ti

o ouro das túas entranas!

POEMIÑA DAS FEIRAS

Hei ir ó Barco ó mercado

e á feira de Sobradelo!

¡Hei apreciar ben o gado

e axustareiche un mantelo!

 

Xa fun a Vilamartín

e a Viloira a feirear.

¡Nestes lugares vivín

A esencia do popular!

 

Hei ir á feira da Rúa,

os meus soños hei vender.

¡Heiche de mercar a lúa

porque o sol non pode ser!

 

Voume meter a tratante

nas feiras de valdeorresas.

¡Vendo soños en mingoante

e merco estrelas acesas!