O pasado sábado 27 de febreiro tivo lugar unha multitudinaria manifestación en Santiago de Compostela en favor dunha completa restauración das nosas rías.

O motivo principal que levou á convocatoria desta manifestación foi pedir a retirada do anteproxecto de Lei de acuicultura, que -de ser aprobado- supoñería un completo desmantelamento do noso mar en favor da empresa privada , e ao mesmo tempo que significaría a total ruína de milleiros de familias galegas que viven do sector pesqueiro, implicaría un enorme impacto medioambiental. O goberno da Xunta de Galicia anunciou in extremis a súa retirada coa clara intención de intentar frear a dita manifestación, pero a pesar deste intento desesperado de botar abaixo a convocatoria, esta seguiu adiante.

E é que o esta debastadora Lei non é a única ameaza á que están sometidas as nosas rías, senón que actualmente o sector marítimo é un dos mais afectados polas políticas que se están levando a cabo desde o goberno galego. Este goberno fai caso omiso das necesidades de mellora deste sector que precisa urxentemente de investigacións sobre as causas da excesiva mortandade de moluscos nas rías, e que tamén precisa dunhas cotas pesqueiras axeitadas para permitir un beneficio aos traballadores do mar.

En definitiva, o que o goberno da Xunta de Galicia está conseguindo coas súas nefastas políticas é unificar a un sector que sempre estivo moi dividido en defensa do noso mar, como se puido apreciar na imaxe da praza do Obradoiro completamente abarrotada de representantes de todos os sectores.

Durante a mañá do pasado 27 de febreiro, Santiago de Compostela tivo mar, un “MAR DE XENTE DO MAR”.