En Galiza temos a fortuna de contar con persoas extraordinarias, das que marcaron unha época e un territorio. Antía Cal é unha delas.

Naceu na Habana no seo dunha familia orixinaria de Muras, a onde regresou con 9 anos. Foi unha das primeiras mulleres galegas que estudou na universidade, fundadora dun colexio onde aplicou métodos pedagóxicos innovadores, unha mestra e pedagoga pioneira da educación en igualdade: para os nenos e as nenas, para @s galegofalantes e para aqueles alumn@s de distintas clases sociais mediante un sistema de bolsas de estudos.

O 28 de novembro os seus veciños quixeron expresarlle o seu cariño, e o Concello  xunto co Observatorio da Mariña pola Igualdade organizaron unha emotiva e persoal homenaxe en Muras. Tivemos a oportunidade de escoitar esa voz profunda, que nace do corazón. Dicíalles aos cativos “Verdade que agora vos ides acordar de min?”

Estou segura de que si se lembrarán. Agora estudan no “Colexio Antía Cal”, pero hanse lembrar non só pola sinxela e simbólica placa de Sargadelos que dende ese día loce no colexio, senón porque a escoitaron e a sentiron no seu Muras natal.

Se queres saber máis sobre Antía, podes descargar aquí material para traballar en casa ou na escola.

Unidade Didáctica sobre Antía Cal.

Tamén podes ler o seu libro autobiográfico:

“Este camiño que fixemos xuntos”.