Por Isaac Iglesias (1º Bac.)

O alumnado do IES decora o centro con diversas e orixinais iniciativas como homenaxe ao ilustre rianxeiro no aniversario do seu nacemento.

O presidente da Real Academia Galega de Belas Artes, Manuel Quintana Martelo, e mais o académico Miguel Fernández-Cid van visitar o centro o próximo luns 1 de febreiro para ver a exposición.

Un ano máis o IES Félix Muriel réndelle homenaxe a Castelao no aniversario do seu nacemento, mais  este ano de xeito especial para sumarse á homenaxe que Real Academia promove ao dedicarlle o Ano das Artes 2016 ao polifacético autor rianxeiro para divulgar e  promover a súa obra gráfica e pictórica.

O alumnado do Félix Muriel, coordinado polo profesorado do Equipo de Normalización e Dinamización da Lingua Galega,  desenvolveu ao longo das dúas últimas semanas diferentes tarefas arredor do seu ilustre veciño.

O alumnado de primeiro de Bacharelato decorou azulexos do centro educativo con algúns dos gravados máis importantes do artista, ademais de colaborar na montaxe dunha exposición arredor dos Álbums de guerra e do Álbum Nós. Durante un par de tardes e varios recreos, un grupo importante de alumnos e alumnas estiveron debuxando á man nos azulexos para logo reproducilos con rotulador permanente. Este labor resultou do agrado dalgúns dos membros da Academia das Artes que decidiron visitarnos para dar conta persoalmente dos resultados.

O alumnado de 2º de Bacharelato reproduciu o escudo deseñado por Castelao, así como os seus simbólicos sombreiro, lentes e cigarro, para penduralos na entrada do centro en dous cadros . Ademais  elaboraron un mural coa mesma simboloxía.

Tamén participaron nestas actividades os máis pequenos da ESO, levando os relatos de Retrincos á linguaxe do cómic.

Ao longo desta semana, o alumnado encargado de divulgar música en galego durante os tempos de lecer, encargouse de emitir pezas musicais relacionadas co autor.

Para finalizar a Semana Castelao, este venres 29 de xaneiro, o ENDLG do centro repartiu entre toda a comunidade educativa pensamentos do autor, espetados en plantas do mesmo nome.