O pasado venres 6 de novembro, os alumnos de 4º ESO do IES Félix Muriel fomos ata Santiago de Compostela co obxectivo de conmemorar un ano máis o “Día da Ciencia en Galego”, neste caso, relacionado coas tecnoloxías da luz.

Tras rematar o segundo recreo (as 10:30), dirixímonos ao autobús e emprendemos camiño a terras santiaguesas. Tan pronto chegamos, percorremos o casco vello e fomos  presenciar unha actividade científica. Na miña opinión, dita actividade foi moi entretida, xa que nos ensinaron, mediante probas, distintos conceptos como a reflexión da luz, a refracción ou mesmo a existencia do arco da vella.

A través dunhas gafas puidemos ver imaxes en 3d e, unha das cousas que máis me gustou foi que, por medio da utilización duns cristais semellaba que podías alcanzar unha rá de xoguete, cando na realidade estaba a bastante profundidade.

Así mesmo, sorprendémonos cos efectos da fibra óptica e intentamos realizar un rectángulo coas súas dúas diagonais mirando para o reflexo do papel nun espello (o que a min persoalmente pareceume moito máis difícil do que nun principio esperaba). Finalmente, un mozo ensinounos o funcionamento duns robots que estaban programados para seguir unha liña negra ou mesmo para diferenciar certas cores.

Tras rematar a exposición fomos comer e, como chovía dirixímonos ao centro comercial “As Cancelas”.

Pola tarde, regresamos ao centro de Santiago onde visitamos un museo de arte e as terras que estaban ao seu redor.

Deseguido, achegámonos de novo a zona vella, onde o profesor Carlos Cimadevila nos explicou parte da historia de Santiago e das súas rúas, entre as que se encontraban “sal si puedes” ou o “carallo”.

Visitamos a facultade de historia e estivemos diante da antiga Sociedade de Amigos do Pais de Santiago, así como de numerosas Igrexas.

Finalmente, regresamos ao autobús e collemos rumbo Rianxo.

Persoalmente, pasei un moi bo rato durante a excursión e creo que foi moi interesante.

Paula Cambeses. 4 ESOA