•  aloumiñala como un arrolo que adurmiña o naipelo que repousa no teu colo

• levala de paseo ao parque para que poida escorregar polo tobogán dos soños

• facela voar con dragóns enormes antes de que Pedro Chosco entre no cuarto das crianzas a fechar todos os ollos

• convidala a esa festa de aniversario onde toda a familia canta contenta unha canción desafinada

• lanzala ao ceo cos papaventos e botala ao chan para que bailen as buxainas

• agasallala en todos as datas que levan dentro unha ilusión compartida e un desexo de felicidade

• introducila na lista da compra para que non se nos esquezan o azucre e as patacas

• compartila arredor dunha mesa redonda onde alguén fai un brinde polo futuro

• levala de compras para que vexa escaparates co cartel de rebaixas

• usala cando namoramos como parvos para non aburrirnos como ostras

• metela na maleta que nos leva de viaxe por todos os mapas que soñamos

• poñela elegante para que desfile polas mellores pasarelas

• escribila nas paredes con versos que poida entender todo o mundo

• pedila ao camareiro para que nos saiba mellor o café con leite

• ensinarlla aos turistas como a mellor postal da nosa terra

• levala ao traballo a primeira hora para que se comporte puntual e eficiente

e, sobre todo,

• sacala fóra cando nos piden que a gardemos