Despois de gañar numerosos concursos como Nsaio no Camiño, Gz Crea e o Foudation Reggae Festival, irromperon na escena nacional e internacional no ano 2009 co seu primeiro disco “Em Terra de Ninguem“.

Catro anos despois dese lanzamento, e logo dunha campaña de Crowdfunding, Som do Galpom presentaba noa no 2013 “Galinha de Troia”. O último traballo da banda mantén a mestura de sons característica do grupo, cunha destacada presenza de rap e funk.

Os irmáns Brais e Gael Bassave, violín e voz do grupo, facilítanme a realización da entrevista que podedes ler a continuación.

 

1- Como xurdiu a idea de formar o grupo?

Pois foi por decembro de 2005 cando Brais (compositor e violinista) xunto con outro compañeiro chamado Juan (percusión) decidiu montar un grupo que fose unha mestura de estilos musicais (funki, reggae,…) dentro dos que encadrar o rap; foi por iso polo que avisaron a Gael (cantante) para que puxera dentro dese proxecto musical as rimas propias do rap.

Estes tres rapaces se xuntaron nun “galpón” e comezaron a darlle forma aos primeiros temas do grupo acuñando o seu estilo como funki-reggae-rap. A idea era facer un grupo de música cun estilo orixinal e fresco.

Foron engadíndose membros e novos instrumentos ata chegar á formación que coñecemos hoxe en día con Brais e Gael que seguen ao fronte do proxecto.

2- De onde saíu o nome ?

O nome foi unha escolla moi complicada, inda que ao final xurdiu un nome que destacaba por riba de todos: Som do Galpom; este nome tiña moita sonoridade e explicaba moi ben o que era o grupo e de onde viña, xa que a banda ensaiaba nun “galpón” na aldea de A Moniña (Biduído, Ames).

3-Que queredes transmitir coa vosa música ?

Coa música sempre se trata de transmitir enerxía; é un grupo que se sinte cómodo tocando en directo. Aí, en contacto ca xente, é onde o grupo mostra a súa enerxía positiva e de loita social.

O máis importante é crer no que se conta, por iso é tan importante transmitir unha mensaxe. As letras sempre falan de algo concreto (amizade, amor, infancia…) e, sobre todo, dos problemas que sufre a sociedade actual. É como quererlle poñer voz a todos e a todas as persoas que loitan contra un sistema inxusto que trata de silencialas.

4- Vindes de gravar o voso segundo traballo discográfico “Galinha de Troia”; que salientades del ?

Neste segundo disco houbo un proceso moito máis longo de gravación e produción. Tardaron case seis meses dende que entraron no estudo ata que deron por rematado o proceso de gravación.

En “Galinha de Troia”  pódese comprobar unha evolución musical do grupo coa incorporación de novos instrumentos (por exemplo, o teclado) e novos estilos musicais (coma o folk). Existe unha maior progresión dentro dos temas e máis complexidade musical; cabe destacar a influencia de Javier Abreu que foi o produtor do disco.

O disco conserva a esencia do grupo con novos sons e ritmos, que se incorporan dun xeito orgánico a todas as composicións.

5-É doado editar e distribuír un disco en Galicia ?

Semella máis complicado do que logo resulta. Se tes algúns contactos pódelo editar sen discográfica e o único complexo é conseguir os cartos para pagalo.

Co tema da distribución convén dicir que cada vez quedan menos distribuidoras en Galiza, inda que non é un caso illado xa que en España se sofre o mesmo proceso.

A industria discográfica está en crise, polo que cada ano que pasa vai tendo menos sentido editar un disco para a súa distribución física. O futuro se atopa na distribución dixital.

6- Como organizades o traballo de composición das vosas pezas ?

Normalmente o proceso vai en dúas fases: a primeira é a composición musical feita por Brais e nun segundo momento Gael lle incorpora a letra a esas composicións. Ás veces este proceso se realiza á inversa e vai primeiro a letra e logo a música.

7- A vosa música é unha aposta por conxugar a crítica co optimismo. Credes necesaria esta combinación na actualidade?

Esta claro que tal é como está de mal a situación laboral, social e política na actualidade como non tomemos as cousas con optimismo e alegría non imos chegar a ningún lado.

Non podemos caer no pesimismo pero tampouco no conformismo; a xente debe loitar en contra das inxustizas e polos seus dereitos pero intentando desfrutar dos bos momentos que nos brinda a vida.

8-Notades algún tipo de atranco á hora de dar a coñecer o voso traballo ?

A lingua pode ser unha axuda nun primeiro momento para darte a coñecer en Galiza; mais se un grupo quere ter unha maior proxección nacional ou internacional, o feito de que as cancións estean nun idioma minoritario pode chegar a ser un lastre contra o que se debe loitar.

 

9- Que opinades da formación musical en Galicia ?

Coma noutros lugares, a formación é bastante boa, o verdadeiro problema é o grado de profesionalización ao que se pode aspirar. Fai falla un maior investimento para que os grupos e os músicos poidan vivir do seu traballo. Non existe unha infraestrutura suficiente na industria musical para que os músicos poidan vivir da música; vivir da música é moi complicado a día de hoxe.

10-Cales son os vosos próximos concertos ? Algunha zona preto de Rianxo ?

As nosas próximas datas son por Compostela, Manzaneda, A Illa de Arousa, Lalín… Pero para saber máis teredes que estar atentos ás redes socias (facebook, twiter…) onde imos colgando todas as nosas actuacións.