Artigo: Carla Tubío (PCPI-2)
Imaxes: Pablo Suárez e Carla Vidal (PCPI-2)

Libros? Algunha vez os seus propios fillos lle preguntarán que é iso. Cada día os libros utilízanse menos, xa están “pasados de moda” e o que máis se
usa agora son os chamados eBooks, tamén coñecidos como libros electrónicos.
Como a moitos outros asuntos, ao libro tamén se lle adica un día ao ano, pero ese é o único día do ano no que nos temos que acordar deles?
Os libros, aqueles obxectos xa case de anticuario, que cada vez que pensamos neles nos reportan á nosa infancia, cando eran o noso único soporte cultural e a calquera estudante lle resultaba practicamente imposible facer a súa carreira sen eles.
A celebración en España deste día chegou no Século XX e alúdese a varios motivos. Uns din que para conmemorar a morte de Cervantes; outros, que para lembrar a morte de Shakeaspeare; aínda outros, para honrar o inca Garcilaso de la Vega; os cataláns, para celebraren o Sant Jordi, cabaleiro morto nesta data, quen, despois de ter vencido ao dragón que aterrorizaba o reino da Capadocia, entregou á súa princesa a rosa que do sangue do dragón nacera e ela regaloulle un libro.
Unhas simples follas de papel merecen tanta celebración porque nelas pódeste refuxiar, podes transportarte a outros lugares e incluso crear outros mundos.
Mais hoxe os libros non están de moda. A sociedade actual le e le máis que en épocas anteriores, pero cambiou os seus soportes de lectura. As estatísticas falan de que está previsto que en 2017 os eBooks superen aos libros impresos. E, seguramente, o máis grave aínda estea por chegar, pois veremos os libros impresos convertidos en obxectos de museo, substituídos polas novas tecnoloxías.
Desde os meus 18 anos, animo aos xoves a que sigan utilizando os libros impresos, a que se deixen levar polo seu tacto e polo seu olor, a que se deixen atrapar polas marabillas que agochan porque son quen de permitirnos soñar cun mundo mellor.