Segundo a Galipedia, a Real Academia Galega (RAG) é unha institución científica, creada en 1906, que ten como obxectivo o estudo da cultura galega e, en especial, da lingua galega. Elabora as súas normas ortográficas, gramaticais e léxica; deféndea e promociónaa. Ademais, decide a personalidade literaria á que se lle dedica o Día das Letras Galegas. Os seus membros son personalidades influentes do mundo da cultura galega, relacionados maioritariamente coa lingua.

O presidente da Real Academia Galega é, actualmente, o profesor Xesús Alonso Montero, nado en Vigo o 28 de novembro de 1928.  Licenciouse en Filosofía e Letras na universidade de Madrid e doutorouse na Universidade de Salamanca. Considérase un ensaísta, poeta e conferenciante en galego cunha gran variedade de publicacións. Xesús Alonso Montero é militante do Partido Comunista dende 1962. Este partido defende o centralismo democrático, que ven do marxismo-leninismo.

Non hai moito realicei unha viaxe a Lugo, onde o presidente da RAG impartía unha conferencia para celebrar o Día da Ciencia en Galego . Pensei que podería, en nome do meu instituto, realizarlle unha entrevista para a Revista do Equipo de Normalización. Pero non foi así. Se ben, como galega que son, gustaríame terlle feito unhas preguntas o señor que “defende os intereses da nosa lingua”. No fondo considero que nunca  ía o señor presidente responder ás miñas preguntas, así que lánzoas á rede para que cada quen reflexione sobre elas.

1-    Que significa para vostede ser presidente da RAG?

2-    Que labor desempeña como presidente?

3-    Como cre que beneficia o galego a existencia da RAG?

4-    Que opina ante a nova lei de educación, LOMCE? Como cre que lle vai afectar ó galego?

5-    Que cre que é necesario para a total normalización do galego? Que fai a Academia ao respecto?

6-  Por que a Academia asumiu no seu momento a normativa illacionista e non a reintegracionista?

7-    Diferentes sectores da cultura galega levan anos reivindicando o 17 de maio para Carvalho Calero. Por que un ano máis non se lle adican as letras galegas a Ricardo Carvalho Calero?

8- Nos últimos anos vense reivindicando que as mulleres entren a formar parte da Academia, pero case sempre son propostos homes ou, mesmo sendo propostas mulleres, acaban sendo elixidos homes. Hai machismo na RAG?

9-   Que pasou na Academia cando demitiu X.L. Méndez Ferrín? Por que demitiu?

10-Por que nesas circunstancias aceptou vostede o cargo?

Tendo en conta o recente conflito xurdido pola máis famosa feira gastronómica do Carballiño, gustaríame engadir unha nova pregunta:

-Realmente considera que “pulpo”, tal e como demanda o Concello de O Carballiño, podería ser unha forma aceptada pola Real Academia da Lingua Galega?

Nunca se sabe o que pode pasar, tal vez un día alguén logre facerlle todas estas preguntas, mentres tanto, nós mesmos podemos buscar as respostas.