Mamen Teijido
Nunha aldea de Guitiriz (Lugo) chamada Os Vilares hai un lugar presidido por una enorme rocha dividida en tres partes por dúas grandes fendas, e cun anaco caído no chan pero apoiado nesta rocha que fai unha cova e refuxio natural. Esta construción dá nome ao lugar, denominado Pena de Roldán, pena á que segundo conta unha lenda, chegou Roldán nos últimos momentos da súa vida.
A pesar de que a Historia sitúa a morte de Roldán -conde da Marca de Bretaña e comandante histórico ás ordes de Carlomagno- na batalla de Roncesvales no ano 778, a lenda lucense asegura que Roldán está soterrado preto desta Pena.
“Nun descanso entre batallas, Roldán pasou preto deste lugar e quedou impresionado pola grandeza da Pena, así que decidiu cortala coa súa espada”Durandarte” en tres cachos, e marcarlle unha cruz latina na súa fronte. Non contento con isto, subiu á Pena e o seu cabalo deixou no alto as súas pegadas. Ás veces, á noitiña, pódese escoitar a Roldán berrar a lombos do seu cabalo a través da Pena…”
… Cantas veces escoitei esta historia da boca de meu avó Agustín! E cantos milleiros de veces berraba comigo e con meus irmáns porque nos atopaba subidos á Pena mirando as pegadas do cabalo! Porque aí están as pegadas, a cruz, o acubillo…
A lenda podemos completala coa historia real do meu tataravó que, a finais do século XIX, decidiu levantar a súa casa a carón da Pena de Roldán, de forma que a parte posterior e un dos lados da casa, son a propia Pena, ao igual que o resto de construcións, que tamén se fixeron arrimadas a ela, co que sempre formou parte da nosa vida familiar. A curvatura natural desta enorme rocha é totalmente visible aínda hoxe na cociña. Alí vivían ata hai ano e pouco meus avós, Agustín e Sara.
A casa dos avós e a Pena forman parte da miña historia e da miña infancia, ligada a este lugar coma a ningún outro. Agora é o momento de que o meu fillo suba á Pena de Roldán cos seus curmáns e que alguén lles berre que é perigoso e que esvara, que está moi alta… mentres eles gozan cos ollos coma pratos mirando as pegadas do cabalo de Roldán, e inventan historias sobre batallas, cabaleiros e espadas máxicas.
E, por certo, non me presentei… Son Mamen de Roldán, filla de Ventura de Roldán e neta de Agustín de Roldán, e se preguntades pola nosa casa nos Vilares, calquera vos indica onde atopala e vos pode contar a lenda.
Se queres participar sigue as intruccións da seguinte ligazón... [Abonarse]