No  mes de novembro visitou o noso centro Marcos Calveiro, para falarnos da súa obra “Palabras de auga” gañadora do Premio Merlín 2012.

Na súa novela, Marcos Calveiro conta a historia de Amadou, un neno que vive no interior de África,  un lugar onde a eterna sequía e a guerra máis cruel condicionan a vida de todos.

O xamán Mkebe ordenou a todos os membros do clan dos Wakati da tribo dos Kimba que abandonasen o país Lomba coa esperanza de atopar unha terra mellor con auga abondosa. Dende entón, homes e mulleres camiñan, baixo un sol abrasador, a sabana poeirenta sen saber que lles pode deparar o futuro. Amadou aprenderá da súa nai a colleitar o alimento agochado nos formigueiros, mais tamén, como afouto guerreiro, haberá de se enfrontar axiña cos perigos da caza e da procura de Numba, o seu irmán maior, desaparecido no campamento dos nenos soldado. Palabras de auga é unha viaxe cara ao interior do continente africano e da súa cultura, mais tamén un camiño iniciático cara á madurez. Un relato emocionante, cativador e conmovedor.