O Programa Conciencia é unha actividade de divulgación científica nacida en 2006 por iniciativa da Universidade de Santiago de Compostela e o Consorcio de Santiago. Articúlase entorno á visita de Premios Nobel, profesores de matemáticas e ciencias da computación. Da súa coordinación ocúpase o galego Xorxe Mira.

• A divulgación científica a cargo de figuras do máximo nivel internacional.

• Proxectar a imaxe da Cidade de Santiago de Compostela como foco universal do pensamento.

• Servir de ponte para o reforzamento de contactos científicos entre líderes da máxima relevancia científica mundial e o corpo de investigadores da USC.

En 2010, o Programa Conciencia foi recoñecido con a Mención de Honor do Premio “Ciencia en Acción”.

O xoves 26 de Abril, estivo na Cidade da Cultura dando unha conferencia, Ei-ichi Negishi, Premio Nobel de Química 2010.

 O Profesor Negishi, un dos químicos orgánicos máis extensivamente citados, obtivo novos métodos para establecer enlaces carbono-carbono. Descubriu novas reaccións usando paladio e outros metais como catalizadores (elementos que fan que unha reacción química sexa posible ou se realice máis rápido), que permitiron unir dúas moléculas.

O resultado foi a formación dun novo enlace simple entre elas.

Estas reaccións melloraron dun xeito asombroso tanto o potencial como a eficiencia da química orgánica sintética e contribuíron substancialmente a posibilitar a construción de moléculas máis complexas, que fan mellores moitos aspectos das nosas vidas, dende a agricultura á medicina. Podería dicirse que, dentro dos mecanismos que establecen a estrutura das moléculas da vida, o Profesor Negishi deu un paso que permitiu o establecemento dunha nova arquitectura molecular.