Xesús Santos, xunto con Xosé Comoxo, é un dos autores do libro “Rianxo na súa historia” no que trata o tema da Guerra Civil no noso concello. O seu neto Marcos Iglesias Santos, alumno de 1ºESO C, entrevistouno para a nosa revista.

-Como e cando empezou a túa paixón pola literatura profesional?

-Eu non me considero un profesional da literatura nin moito menos. Escribo sen continuidade, fágoo máis ben por sentimentos ou impulsos do momento e con pausas máis ben dilatadas. Empecei a facelo xa nos últimos anos da carreira cando entrei en contacto coa literatura, cos clásicos e co teatro galego. Foi cando tomei conciencia da galeguidade.

-Cando eras pequeno xa che gustaba escribir?

-Os pequenos do meu tempo non tiñamos onde escribir. Compoñía versos de memoria, en castelán, porque para min o galego só servía para falar entre nós.

-Que libros che gustou máis escribir?

-Os de poesía e os de teatro para nenos; porque o neno é poeta por natureza e artista por inclinación. É gratificante escribir para eles, pero é máis difícil conectar con eles, son máis esixentes que os máis vellos.

-Que libro che levou máis tempo escribir?

Os libros de investigación histórica son máis traballosos, requiren máis dedicación e tempo, hai que recoller datos en bibliotecas e arquivos para confeccionar as fichas e logo elaboralas e redactalas.

-Prefires traballar só ou con compañeiros?

-Cando se trata de temas de ivestigación prefiro traballar en equipo. Os traballos de campo lévanse mellor en compañía, sempre que se estea coompenetrado cos compañeiros e se faga unha posta a punto en común. Require unha boa comunicación entre as partes.

-Como mestre consideras que a poesía e o teatro lles gusta ós nenos?

-Tanto a poesía como o teatro son temas que hai que tratar con mimo nas escolas, porque teñen un alto valor formativo. Desenvolven a personalidade integral e fortalecen o carácter.

-Que libro doutro escritor foi o que máis che gustou?

-A poesía de Rosalía de Castro, todo o de Castelao e as narracións de Álvaro Cunqueiro e Dieste.

-Cales son os temas que máis che interesan?

 -Co paso dos anos vai cambiando o interese polos temas. Primeiro foi a poesía, despois o teatro, e agora estou metido na investigación da memoria histórica.

-Utilizas o galego para escribir os teus libros?

-A lingua galega é a miña forma de expresión favorita, tanto na fala como na escrita. Non teño nada mellor para comunicarme co pobo.

.