En España, consómense  arredor de  5.000 millóns de envases deste tipo. Esta cifra  consolida o noso país como o terceiro en importancia en Europa, detrás do Reino Unido e Alemaña.

 Reciclaxe

Debido ao considerable aforro producido durante a reciclaxe e á sinxeleza do proceso, o aluminio empezouse a reciclar moi pronto e hoxe en día é unha actividade normal, tecnicamente resolta e rendible. Este proceso aporta, ademais, importantes beneficios medioambientais, económicos e sociais.

O 100% do material de aluminio recuperado pode ser reciclado.

No proceso de reciclaxe non cambian as características do material, xa que se obtén un produto coas mesmas propiedades. Ademais,  o aluminio pode reciclarse indefinidamente e non diminúe a calidade do mesmo
A reciclaxe do envase de aluminio usado é unha actividade industrial rendible que crea emprego. No ano 2001, todo o material recuperado de envases de aluminio usados, representou, en España, un volume de negocio de máis de seis millóns de euros.

Envases recuperados

Actualmente, en España a recuperación deste tipo de envases coséguese por distintas vías. A máis accesible para o consumidor é o xa coñecido contedor amarelo, que podemos ver nas rúas xunto aos de vidro e papel

Non sen bauxita
A materia prima para a produción de aluminio é a bauxita procedente de Brasil (2.800 millóns de toneladas), Guinea (2.600 millóns de toneladas), Xamaica (2.000 millóns) e a India (1.000 millóns de toneladas). Preto de tres billóns de toneladas das reservas mundiais de bauxita atópanse en países en vías de desenvolvemento.
Para elaborar tres toneladas de alumina, óxido de aluminio, necesítanse catro de bauxita. Cando se reduce a aluminio puro, a produción final é unha tonelada. A reciclaxe de aluminio é imprescindible na actualidade, xa que a súa produción prexudica ao medio: a extracción de bauxita a mina aberta deixa un rastro de fango vermello, altamente contaminante. A reciclaxe aforra o 95% da enerxía orixinal que se gasta na conversión da bauxita en aluminio.

.Sabías que…?
-Para confirmar que o envase que tes entre mans é de aluminio, asegúrate de que a base é brillante, e que os imáns non se senten atraídos cara á súa superficie.
-Os botes de bebidas usados recolleitos acadan un valor de ata 1 euro por quilogramo, o que pode traducirse en case dúas pesetas por cada bote.
-O 60% do fornezo mundial de aluminio fabrícase utilizando potencia hidráulica. A produción de aluminio require 14 quilovatios/hora para obter cada quilo de aluminio da alumina. Un quilo de aluminio é equivalente a 50 latas de bebidas.
-O aluminio é velenoso e non se deben cociñar alimentos acedos en tixolas de aluminio.
O ácido pode provocar a disolución de pequenas partículas de aluminio.
-A primeira fábrica de botes de aluminio comezou a funcionar na provincia de Tarragona en 1993.
-As vendas de latas de bebidas en Europa acadaron 33.800 millóns de unidades en 1999, fronte aos 32.700 millóns do ano anterior, o que supón un incremento do 3,5%.
-Outro uso do aluminio é o papel de prata, que representa preto do 40% dos envoltorios de aluminio utilizados no Reino Unido, incluídas as latas de refrescos. Neste país, cada ano tíranse ao lixo 50.000 toneladas de papel de aluminio.

Lixeiro, inoxidable e reciclable sen perda de calidade, o aluminio é o terceiro metal máis abundante da terra e un dos máis utilizados no mundo para a elaboración de envases.