Os Equipos de normalización e dinamización lingüística de tres centros de ensino do concello de Rianxo preparámoslle unha “xira” a Kiko da Silva o pasado martes 17 de febreiro. Comezou no noso IES, logo foi a Taragoña ó CEIP “Brea Segade”, veu ó Castelao e aínda volveu á tarde a Taragoña. Grazas Kiko polo esforzo!

  Martes 17 de febreiro, 9:20 da mañá: Kiko da Silva consegue captar a atención de todo o alumnado de 3º ESO do IES Félix Muriel… mesmo sen micro! Comezou cun breve percorrido sobre a banda deseñada galega e en galego: historia, problemas, características. Presentounos a Retranca e o recente problema da súa publicidade nos autobuses de Vigo (se mirades o blog, hai un par de noticias ó respecto, xa non o repetimos!)

 Pouco a pouco foinos introducindo no mundo do cómic, nos clichés básicos para facer os deseños de tódolos personaxes dunha banda deseñada sen ter que esforzarse demasiado. Puxo os exemplos de Mortadelo e Filemón, dos Simpson e de Sin-chan.

E logo púxonos a traballar a nós! A facer catro caras con expresións diferentes…

 Fixemos o que puidemos, logo el deunos as claves para mellorar os nosos deseños!

Na pizarra deixounos a mostra de como -moi facilmente- podemos ver a “Catro pelos” comendo, con medo, con moita dor ou saído…

  Moi interesante! Encantounos!

Grazas Kiko!