Este xoves pasado, 27 de novembro,  aproveitamos a presenza da Xurxo Souto no IES para presentar o noso CD “Os quinse máis votados”.

A idea de realizar este traballo xurdiu no ENDL do IES Félix Muriel de Rianxo o curso 2007-2008 para dar a coñecer distintos estilos musicais, diferentes grupos e cancións que se poden facer no noso idioma.

Como primeiro paso elaboramos unha lista de 100 grupos e intérpretes que cantaban en galego e pasamos a facer unha votación popular para seleccionar aqueles preferidos entre o noso alumnado, de aí xurdiu esta recompilación, escollendo os 15 grupos máis votados, xa que a partir dese número as puntuacións de cada candidato eran pouco representativas. De feito, mesmo houbo unha diferenza de votos considerable entre os tres primeiros e os restantes, polo que decidimos seleccionar varias cancións deses grupos primeiros e só unha dos demais.

Como complemento ás audicións quixemos completar ese traballo salientando algúns datos de interese de tódolos grupos, e máis xuntar as letras das cancións gravadas.

O galego empregado non é o normativo pero consideramos que iso non é o máis importante, senón comprobar que a nosa lingua segue viva e está presente nos distintos estilos musicais, non só no folk co que máis se adoita relacionar, senón tamén no rock, no reggae, no rap…

Á hora de ordenar as pezas presentáronsenos varias posibilidades:

1. O número de votos, pero varios grupos estaban co mesmo número, polo que despois teriamos que ter usado outro criterio.
2. Os estilos musicais, pero pareceunos que sería máis monótono escoitar de seguido grupos “semellantes” e ademais, que estilo poñiamos de primeiro?
3. A orde alfabética, pola que finalmente nos decidimos, xa que así os estilos irían de xeito aleatorio e non se lle daban matices de importancia.

Na selección das pezas fixemos outra consulta popular das cancións preferidas entre o alumnado, consultamos aos grupos e tamén nos pareceu interesante incluír algunha peza do último traballo publicado de cada grupo, aínda que non fosen as pezas máis coñecidas e populares e, finalmente, este foi o resultado que esperamos sexa do agrado de todos e todas.